YN YR ŴYL ~ Y Golygydd
UNWAITH
eto dyma droi'n weddol galonnog i'ch cyfarch. Mae'r gefnogaeth i'r Gymdeithas,
ac o ganlyniad i'r Casglwr yn dal ar gynnydd a phleser felly yw cael ad-dalu
rhywfaint i'r ffyddloniaid. Felly, gan ddechrau gyda'r rhifyn hwn, fe
benderfynwyd, hyd y mae hynny'n ymarferol bosibl, i godi maint y cylchgrawn yma
i ugain tudalen. Fe lwyddwyd i gyrraedd y nod y tro yma ond dibynna'r dyfodol
ar eich cydweithrediad ymarferol chwi.
Ceisir gofalu bod pob cyfraniad yn un y
medrir dibynnu arno - ac y mae nifer dda o ysgolheigion disgleiriaf Cymru yn
ysgrifennu'n gyson. Ond cylchgrawn i bawb, yw hwn ac y mae pob cyfraniad a ddaw
i law yn cael croeso mawr. Ac fel y daw'r rhifyn yma o'r wasg mae'r gwaith o
baratoi rhifyn y Nadolig yn cychwyn, a'r golygydd yn gweddïo’n ddi-baid nad
biliau yn unig sydd i gyrraedd efo'r postman o hyn hyd at ddiwedd y flwyddyn.
Calondid
arbennig y tro hwn oedd cael croesawu cynifer o lythyrau – daliwch ati, da chi.
Hefyd mae yna fwy o hysbysu anghenion yr aelodau – manion ar werth neu'n
eisiau. Cofiwch eich bod yn cael rhoi'r rhain yn y papur am ddim.
Yn
y Brifwyl yn Llangefni fe gynhelir holl fusnes Y Casglwr ym mhabell Gwasg
Gwynedd. Cewch gyfle i gyflwyno aelodau newydd, i sicrhau ôl-rifynnau, ac i
dalu eich dyledion hefyd.
Y Ddarlith
Atyniad blynyddol arall yn y Brifwyl fydd
darlith flynyddol Cymdeithas Bob Owen. Fe gynhelir hon yn y Babell Len am
hanner awr wedi deg fore Gwener. Y darlithydd yw Dr R. Geraint Gruffydd. Ei
destun fydd y cymeriad lliwgar hwnnw, Siôn Dafydd Rhys.
Mae croeso i bob eisteddfodwr ddod i'r
ddarlith yma - a hyderwn y byddwch chwi'r aelodau fydd yn Llangefni y bore
hwnnw yn eich seddi yn gynnar, canys yr oedd hi'n orlawn yn Abertawe y llynedd,
pan anerchwyd gan yr Athro Brynley F. Roberts.
Hyderwn
hefyd y bydd Cymdeithas Lyfryddol Cymru yn atgyfodi gyda hyn ac y bydd yn
cyhoeddi darlith Abertawe, pan atgyfodir eu cylchgrawn hefyd. Bydd copïau o'r
ddarlith ym Machynlleth ar Gyhoeddwyr Maldwyn ar werth ym mhabell Gwasg Gwynedd
yn ystod y Brifwyl.